話口未完，1個月HIBOR又從上星期大約1%，颷到1.33%。呢個禮拜，再講講加息呢件事，希望各位從業員可以有更加“正確“嘅瞭解。
首先，我地日常講：“香港會唔會加息”。其實係有語病。平時講，唔好太認真，因爲我都係咁講，但就搞到好多臨時分析員諗到錯曬。
因爲如果接受到呢一句，就好自然會接下一句：“如果加息，對香港經濟影響好大，尤其增加供樓人士負擔，疫情已經搞到經濟好差，所以唔會响呢個時候加息啊。”
呢句其實好有邏輯。。。如果將香港換成美國（所以顯示好多人，係照搬人地D分析，只係改左個Subject，其實自己根本唔瞭解事情）。
美國，因爲可以自己印銀紙（認真D講，係佢地有自己嘅貨幣政策），所以可以定一個聯邦儲備利率，然後影響其他市場利率，包括一個係好重要嘅樓按利率。聯儲局決定加唔加息，會睇好多野，對經濟影響、通脹會唔會失控，甚至（雖然佢地從來話自己獨立）經濟表現會唔會影響國會/總統選舉。
拜登會唔會打電話黎：“阿鮑仔（聯儲局主席），幫下手，年底國會改選啊。。。你識做時我識做。”（純粹設計對白，我以小人之心度阿拜登大人之腹。）
所以，美國真係加息，或者唔加息，確實係一個人爲決定。但香港完全唔係果回事。
香港金管局，雖然都有一個貼現率，不過大部分時間，只係屬於一個防止市場失控嘅機制，唔係一個利率指標。正如大家都知道，香港人，無論金融界定一般市民，由朝多晚望住果個係HIBOR。
HIBOR係一個市場利率，唔係有一個人，或者委員會去考慮經濟、供樓人士負擔、疫情等等去決定加唔加。所以，To be exact，香港利息唔係加唔加，係升唔升。
市場供求，好多因素，但幾肯定，參與HIBOR市場嘅機構（銀行），落價時候應該唔會考慮“供樓人士供樓供得好辛苦”呢樣野。
我明白今日揾食，就算係賣保險，都要同客戶吹兩嘴經濟，但真係要選擇性吸收，正正經經睇下權威性金融報道，即係外國果D，而家好多都有中文版。英文好，睇原文，否則睇中文版，都好過你信香港果D堅守維護國家安全原則嘅傳媒。
Comentários